ناقص دبدوبْ
فتّشت كتير هداياي الرّاجعة ومالقيتهوش
دوّرت فْ كل هدية كتير بالطول والعرض
وقلبت الشنطة كمان عَ الأرض
ولقيتْ دِبلة وجوابات وكروت
وجنيه مقسوم وصُور وقلوبْ
لكن برضُه
ناقص دبدوبْ
*******
كل اللي فْ قلب الشنطة معايا بيستنظَر
وبجدّ الشنطة بدون دبدوب
مالهاش منظرْ..
كل الجوابات ممكن يكتبها حبيب غيري
والدِبلة خلاص موضوعها اتشال من تفكيري
والباقي حاجات بتكون دايماً بين أي اتنين
وبتتكرّرْ
وفْ شنطة كلّ حبيب وحبيبة هتِلْقى حاجات منهُم وأكترْ
وهتِلقى شموع ودموع وفرَح وأمل ساكِنْ
ممكِن
لكِنْ..
مش كل حبيب بيجيب دبدوبْ
*******
وازّاى أنساه؟
وأنا كل أيامي الحلوة معاكي.. معاه
أيام ماعشقتِك قبل ما أقول
وأيام ما حلمتِك قبل ما أطول
وأيام وأيام بتفوت على طول
وأنا وأنتي فْ كل دقيقة
بنبْني جنينة حب وشوق وأمَلْ
وأنا قلبي الدِيبْ
على إيدِك والله لقيتُه حَمَلْ
كنت أمّا أزعلْ
ألاقيكي بتِجري على الدبدوب
لجْلْ يصالحِك
وفْ أحزانِك بيمدّ إيديه
علشان يمسح دمعة جرحِكْ
وفْ فرحِك
كان من فرْحُه يطيرْ
دا أنا كُنت باغِيرْ
لمّا أعرف إنّه امبارح كان بين دراعِينكْ
وباحسّ ساعات وكأنه حَرَس بيني وبينِكْ
وأتخيّل إنّه ساعتها خلاص قرّب منّك
وعينيكي عَلِيه
وإيديكي عَليه
أجري وأطلّع صورتِك وأندَهْ
والله يا روحي أنا اللي شارِيه
وسنين بتفوت وقلوب بتدوب
وفْ لحظة خلاص يخدعنا كلام
وتموت أحلام
ويضيع دبدوبْ
*******
فاكراه ولاّ إنتي خلاصْ ناسياه
مع كلّ زماني اللي عشقتُه
طَب فاكرَة أنا امتى زمان جِبْتُه؟
كات أول مرة انطقها (بحبّك) قدّامِك
كات أول مرة أدخل في عينيكي بدون ما أخْجَل
سلّمت كتير على كل رموشِك عَ المدخَل
وفْ لحظة لقيتني فْ قلب عينيكي بدون صاحب
وجناين مَاليَة ربوع عِينك مالهاشْ صاحِب
وساعات بامشيها وحاسِس إني خلاص مجنون
من كُتر المشْي نسيت إن أنا أصلاً ف عيون
ولقيتني فْ ننّ عينيكي خلاص بعد المشوار
ولقيتلي فْ ننّ عنيكي جناين فُلّ ودار
ومشاعر حب وشوق وحنين وحنان جَارْفَة
عارفَة؟
مع إنّ عينيكِ مَاهِيّش خَضْرَة
الدنيا تملّي فْ ننّ عينيكي تبان خَضْرة
مليانة أمل بتحاوْطُه الأحلام والخُضْرة
وأنا كلّ ما أنام
قلبي الحيران بيلوم رِمشي
وأمّا أتحرّك وأعمِل ماشي
بيقول لي: حرام.. لسّه هتمشِي؟
وسنين بتمرّ عليّ فْ نِنّ عينيكي السُودْ
وفْ لحظة لقِيتني خلاص مَطْرودْ
على ناصية أوّل رِمش بعيدْ
من غير دبدوبْ
*******
قلبي الطيّب
مش قادر ينسى سنين فاتِتْ
مش قادر يرمي حكايةْ حُبُّه عشان غلطَة
ويقول: ماتِتْ..
جايلك من تاني بحلم جديد
جايلك وفْ إيده أمل وحنان ولُقى ومواعيد
ومعاه دِبلة
وجوابات وكروت
وجنيه مقسومْ
وصور
وقلوب
جاي بيقولِكْ
عَلشان خَاطْرِي..
خلّي الدبدوبْ
منقول
